အမေးများသော ကိုဗစ်ကာကွယ်ဆေးအကြောင်း (Sinovac & Sinopharm)

Zifam Myanmar Facebook Fan များအမေးများသောကြောင့် ကိုဗစ်ကာကွယ်ဆေးများအကြောင်းကို ကျန်းမာရေးဗဟုသုတ ရရှိစေရန်ရည်ရွယ်ပြီး တင်ဆက်ပေးခြင်းဖြစ်ပါတယ်။

မည်သည့်နိုင်ငံမှထုတ်လုပ်သည့် ကာကွယ်ဆေး၊ မည်သည့်ကုမ္ပဏီ၊ မည်သည့်အဖွဲ့အစည်း နှင့် ဆေးဝါးများကို Marketing သဘောအနေဖြင့် ရည်ရွယ်တင်ဆက်ခြင်းမဟုတ်ပါ။

ဘယ်သူတွေကို ဦးစားပေးထိုးသင့်ပါလဲ?

ဆေး(၂)မျိုးလုံးကတော့ ကျန်းမာရေးစောင့်ရှောက်မှုပေးတဲ့သူတွေ၊ ကိုဗစ်နဲ့ထိတွေ့မှုအန္တရာယ်များတဲ့သူတွေ၊ သက်ကြီးရွယ်အိုပိုင်းတွေကို အဓိက ဦးစားပေးထိုးထားသင့်ပါတယ်။

(၁၈)နှစ်အောက်အရွယ်တွေမှာတော့ လေ့လာစမ်းသပ်ထားတဲ့ တွေ့ရှိချက်တွေ ခိုင်ခိုင်မာမာမရှိသေးတဲ့အတွက်ကြောင့် ထိုးဖို့ အားမပေးထားပါဘူး။

နောက်ထပ်ဘယ်သူတွေ ထိုးထားသင့်ပါသလဲ?

အဝလွန်ရောဂါ၊ နှလုံးရောဂါ၊ အသက်ရှူလမ်းကြောင်းနဲ့ဆိုင်သော တခြားရောဂါအခံရှိတဲ့သူတွေ ထိုးထားသင့်ပါတယ်။

ကိုဗစ်ရောဂါကူးစက်ခံခဲ့ဖူးတဲ့သူတွေကိုလဲ ထိုးပေးလို့ရပါတယ်။ လေ့လာတွေ့ရှိချက်တွေအရ ကိုဗစ်ရောဂါကူးစက်ခံဖူးတဲ့သူတွေဟာ (၆)လ အတွင်း နောက်တစ်ခါထပ်မံကူးစက်ခံရဖို့ အခွင့်အရေး နည်းပါးကြောင်းလဲ တွေ့ရှိရပါတယ်။

ကမ္ဘာ့ကျန်းမာရေးအဖွဲ့အစည်း (WHO) အနေဖြင့် နို့တိုက်မိခင်တွေမှာလဲ ကိုဗစ်ကာကွယ်ဆေးထိုးထားသင့်ကြောင်းနဲ့ ကာကွယ်ဆေးထိုးထားခြင်းကြောင့် ကလေးနို့တိုက်ခြင်းကိုရပ်လိုက်တာမျိုး မပြုလုပ်ကြဘဲ မိခင်နို့ကို ဆက်လက်တိုက်ကျွေးပေးပါရန် အကြံပေးထားပါတယ်။

HIV ရောဂါပိုးရှိတဲ့သူတွေမှာလဲ ကိုယ်ခံအားနည်းနေတဲ့အတွက်ကြောင့် ကိုဗစ်ရောဂါကို ဆိုးရွားစွားခံစားရနိုင်ပါတယ်။ ကာကွယ်ဆေးအတွက် လေ့လာစမ်းသပ်ချက်တွေမှာ HIV ရောဂါပိုးရှိတဲ့ လူနာတွေ၊ ကိုယ်ခံအားကျဆင်းနေတဲ့လူနာတွေကို ပါဝင်စမ်းသပ်ထားခြင်းမရှိပေမယ့် ကာကွယ်ဆေးထိုးခြင်း၏ ကောင်းကျိုး၊ ဆိုးကျိုးတွေကို နှိုင်းယှဉ်ဆွေးနွေးပြီး ထိုးသင့်ပါတယ်။

ဘယ်သူတွေမှာ ကိုဗစ်ကာကွယ်ဆေးမထိုးသင့်ဘူးလဲ?

ကိုဗစ်ကာကွယ်ဆေးတစ်မျိုးမျိုးနဲ့ ဓာတ်မတည့်တဲ့လက္ခဏာဖြစ်ဖူးသူတွေ၊ လတ်တလော ကိုဗစ်ရောဂါလက္ခဏာခံစားနေရတဲ့သူတွေ၊ ကိုယ်အပူချိန် ၃၈.၅’C ထက်များနေတဲ့သူတွေမှာတော့ ကာကွယ်ဆေးမထိုးသင့်ပါဘူး။

ကိုယ်ဝန်ဆောင်မိခင်တွေမှာကော ထိုးလို့ရနိုင်ပါသလား?

ကိုယ်ဝန်ဆောင်မိခင်တွေမှာ ကိုဗစ်ကာကွယ်ဆေးအာနိသင်ကောင်းကျိုးနှင့် ဆိုးကျိုးအတွက် လေ့လာစမ်းသပ်ချက်မှတ်တမ်းလုံလုံလောက်လောက်တော့မရှိသေးပါဘူး။

ဒါပေမယ့် ကိုဗစ်ကာကွယ်ဆေးထုတ်လုပ်ထားမှုဟာ အသည်းယောင်အသားဝါ ဘီပိုးကာကွယ်ဆေး ၊ မေးခိုင်ကာကွယ်ဆေး အစရှိသည့်တို့နဲ့ အလားပုံစံတူတူပဲဖြစ်တဲ့အတွက်ကြောင့် စိတ်ချရနိုင်ပါတယ်။

ကမ္ဘာ့ကျန်းမာရေးအဖွဲ့အစည်း (WHO) ကတော့ ကိုဗစ်အဖြစ်များတဲ့နိုင်ငံတွေမှာ ကိုယ်ဝန်ဆောင်မိခင်တွေအတွက် ကာကွယ်ဆေးထိုးခြင်း၏ ကောင်းကျိုး၊ ဆိုးကျိုးကို နှိုင်းယှဉ်ပြီး ထိုးသင့်ကြောင်း အကြံပေးထားပါတယ်။

ကိုဗစ်ကာကွယ်ဆေးတွေဟာ ယုံကြည်စိတ်ချရနိုင်ပါသလား?

Sinovac နှင့် Sinopharm ဆေးဟာ အသက် (၁၈)နှစ်နဲ့ အထက်အတွက် ကာကွယ်ဆေးရဲ့အာနိသင် ထိရောက်မှုနဲ့ ယုံကြည်စိတ်ချရမှုအတွက် လေ့လာစမ်းသပ်ထားတဲ့ မှတ်တမ်းတွေရှိပါတယ်။

အသက် (၆၀) အထက်အရွယ်တွေမှာတော့ ကာကွယ်ဆေးထိုးလို့ရတယ်ဆိုပေမယ့် လေ့လာစမ်းသပ်ထားတဲ့အချက်အလက်တွေ အနည်းငယ်သာရှိတဲ့အတွက်ကြောင့် ဆေးထိုးပြီးတဲ့အခါ အနီးကပ်စောင့်ကြည့်နေပေးဖို့ လိုအပ်ပါတယ်။

ကာကွယ်ဆေး အာနိသင်ထိရောက်မှုက ဘယ်လောက်ထိကာကွယ်နိုင်ပါသလဲ?

Sinovac

ဘရာဇီးလ်နိုင်ငံ၌ Sinovac ကိုဗစ်ကာကွယ်ဆေး (၂)ကြိမ်ကို (၁၄)ရက်ခြားထိုးပြီး လေ့လာစမ်းသပ်ခဲ့ရာ ဒုတိယအကြိမ်ဆေးထိုးပြီး (၁၄)ရက်အကြာမှာတော့ ကိုဗစ်ကူးစက်နိုင်မှုကို ၅၁%၊ ပြင်းထန်သောကိုဗစ်နှင့် ကိုဗစ်ကြောင့်ဆေးရုံတက်ရောက်မှုကို ၁၀၀% ကာကွယ်ပေးနိုင်ကြောင်းတွေ့ရှိရပါတယ်။

Sinopharm

နိုင်ငံပေါင်းအစုံ၌ Sinopharm ကိုဗစ်ကာကွယ်ဆေး (၂)ကြိမ်ကို (၂၁)ရက်ခြားထိုးပြီး လေ့လာစမ်းသပ်ခဲ့ရာ ဒုတိယအကြိမ်ဆေးထိုးပြီး (၁၄)ရက်အကြာတွင် ကိုဗစ်ကူးစက်နိုင်မှုနှင့် ကိုဗစ်ကြောင့်ဆေးရုံတက်ရောက်မှုကို ၇၉% ကာကွယ်ပေးနိုင်ကြောင်းတွေ့ရှိရပါတယ်။

Sinopharm ဆေး၏အာနိသင်လေ့လာချက်များမှာတော့ တခြားသောရောဂါအခံရှိတဲ့သူများ၊ ကိုယ်ဝန်ဆောင်များနှင့် အသက်(၆၀) အထက်များနှင့် အမျိုးသမီးများကို လုံလုံလောက်လောက်ထည့်သွင်းစမ်းသပ်ထားခြင်းမရှိကြောင်း ဖော်ပြထားပါတယ်။

ကာကွယ်ဆေးကို ဘယ်လိုထိုးရမလဲ?

Sinovac ကော Sinopharm ကော ကာကွယ်ဆေးနှစ်မျိုးလုံးကတော့ (၂)ကြိမ်ထိုးရပါမယ်။

Sinovac ကတော့ တစ်ကြိမ်နဲ့ တစ်ကြိမ် ၂ပတ် ကနေ ၄ပတ် ခြားပြီး ထိုးပေးရပါမယ်။ ဒုတိယတစ်ကြိမ်ကို ၂ပတ်မတိုင်ခင် စောထိုးမိရင်လဲ ထပ်ထိုးစရာမလိုပါဘူး။ ၄ပတ်ထက်နောက်ကျရင်တော့ အမြန်ဆုံးထိုးဖို့လိုအပ်ပါတယ်။

Sinopharm ကတော့ တစ်ကြိိမ်နဲ့တစ်ကြိမ် ၃ပတ် ကနေ ၄ပတ် ခြားပြီးထိုးပေးရပါမယ်။ Sinopharm ဆေးမှာလဲ ဒုတိယတစ်ကြိမ်ကို ၃ပတ်မတိုင်ခင် စောထိုးမိရင်ထပ်ထိုးစရာမလိုပါဘူး။ ၄ပတ်ထက်နောက်ကျရင်တော့ အမြန်ဆုံးထိုးဖို့လိုအပ်ပါတယ်။

ဒီကာကွယ်ဆေးတွေဟာ ကိုဗစ်ဆင့်ကဲပြောင်းလဲလာသောရောဂါပိုးအပေါ် ထိရောက်မှုရှိပါသလား?

လတ်တလောအချိန်ထိ WHO Strategic Advisory Group of Experts (SAGE) မှ ထိုးနိုင်ကြောင်းထောက်ခံထားပါတယ်။

အသစ် အသစ်သော ရှာဖွေတွေ့ရှိချက်များထပ်မံထွက်ပေါ်လာရင်လဲ WHO မှ ထုတ်ပြန်ဖော်ပြပေးသွားမှာဖြစ်ပါတယ်။

ကာကွယ်ဆေးထိုးထားခြင်းဟာ ရောဂါပြန့်ပွါးမှုကိုကာကွယ်နိုင်ပါသလား?

ကာကွယ်ဆေးထိုးထားခြင်းကြောင့် ရောဂါပြန့်ပွါးမှုကာကွယ်နိုင်ခြင်းအတွက် တိကျခိုင်မာတဲ့မှတ်တမ်းတွေ မရှိသေးပါဘူး။

ဒါကြောင့် ကမ္ဘာ့ကျန်းမာရေးအဖွဲ့အစည်း (WHO) က

Mask တပ်ခြင်း
လက်ဆေးခြင်း
တစ်ဦးနဲ့ တစ်ဦး (၆)ပေ အကွာတွင်နေခြင်း
လူစုလူဝေးရှောင်ရှားခြင်း
လေဝင်လေထွက်ကောင်းအောင်ထားရှိခြင်း စသည်တို့ကို ဆက်လက်လုပ်ဆောင်သွားဖို့ အကြံပေးထားပါတယ်။

Covid ကာကွယ်ဆေးနှင့်ပတ်သက်သော ကျန်းမာရေးဗဟုသုတများတိုးပွားစေရန် ရည်ရွယ်ပြီး ကမ္ဘာ့ကျန်းမာရေးအဖွဲ့အစည်း (WHO)မှ ဖော်ပြထားသည်များကို Zifam ကုမ္ပဏီမှ ယခုလိုတင်ဆက်ပေးထားခြင်းဖြစ်ပါသည်။

Ref:
WHO, 2021. World Health Organization. [Online]
Available at: https://www.who.int/…/the-sinovac-covid-19-vaccine-what…
[Accessed 3 August 2021].

WHO, 2021. World Health Organization. [Online]
Available at: https://www.who.int/…/the-sinopharm-covid-19-vaccine…
[Accessed 3 August 2021].

#COVID19 #vaccine

#Sinovac #Sinopharm

#zifam #CaringforWellbeing